بیجنگ۔19اکتوبر(اے پی پی) نگراں وزیراعظم انوار الحق کاکڑ تے چین دے صدر شی جن پنگ سی پیک دی تکھے تعمیر دی اہمیت تے زور ݙیندے ہوئیں اینکوں ترقی، روزگار، جدت اتے گرین ڈویلپمنٹ دی راہداری بݨاوݨ سانڳے کلیدی قرار ݙتے جݙاں جو مختلف سطح تے سٹریٹجک رابطے تے بین الاقوامی فورمز تے تعاون جاری رکھݨ دے نال نال تذویراتی شراکت داری کوں مزید تکڑا کرݨ تے اتفاق کیتا ڳئے ۔ ݙوہیں رہنماواں وچال تریجھے بیلٹ اینڈ روڈ فورم دے موقع تے گریٹ ہال آف پیپلز اچ ملاقات تھئی ۔ وزیراعظم آفس دے میڈیا ونگ توں جاری بیان موجب ݙوہیں راہنماواں ابھردے ہوئے علاقائی اتے عالمی امور تے ڳالھ مہاڑ کیتی تے سارے امور تے اتفاق رائے پاتا ڳئے۔ ݙوہیں رہنماواں سی پیک دی تکھے تعمیردی اہمیت زور ݙیندے ہوئیں اینکوں ترقی، روزگار، جدت اتے گرین ڈویلپمنٹ دی راہداری بݨاوݨ سانڳے کلیدی قرار ݙتے۔ انہاں ایں ڳالھ تے وی زور ݙتے جو پاکستان دی پائیدار تے مجموعی سماجی و اقتصادی ترقی ایندی نال جڑی ہوئی اے ۔ انہاں اتفاق کیتے جو ݙوہیں ملک مختلف سطح تے سٹریٹجک رابطے تے بین الاقوامی فورمز تے تعاون جاری رکھیسن ۔ وزیراعظم چینی صدر کوں تریجھے بیلٹ اینڈ روڈ فورم دے کامیاب انعقاد تے مبارخ ݙتے تے انہاں دے بیلٹ اینڈ روڈ انیشی ایٹیو دے مستقبل دے لائحہ عمل دے حوالے نال پیش کیتے ڳئے اٹھ نکتے دی تعریف کیتی ۔ ݙوہیں راہنماواں پاکستان تے چین وچال مابین سٹریٹجک تعاون تے مبنی شراکت داری اتے بین الاقوامی سطح تے ابھردی ہوئی صورت دے پس منظر اچ ایندی سٹریٹجک اہمیت کوں اجاگر کیتے ۔ ملاقات اچ ایں ڳالھ تے اتفاق تھئے جو ݙوہیں ملکاں دے سانجھے مفاد کیتے اعلی سطحی رابطے کوں ٻیا تکڑا بݨایا ویسی ۔ وزیراعظم انوار الحق کاکڑ آکھیے پاکستان اتے چین قابل اعتماد شراکت دار اتے بہترین دوست ہن۔ چین دے کلیدی امورتے پاکستان دے غیرمشروط ساتھ دا اعادہ کریندے ہوئیں وزیراعظم آکھیے پاکستان تے چین دے تعلقات خطے اچ امن و استحکام دا باعث ہن۔ صدر شی جن پنگ آکھیے پاکستان چین دا تکڑا بھرا تے قابل اعتماد دوست اتے امن و ترقی اچ شراکت دار اے۔ انہاں آکھیے چین پاکستان کوں اپݨی خارجہ پالیسی اچ ٻہوں اہمیت ݙیندے تے چین، پاکستان دی اپݨی سالمیت، سرحداں دے تحفظ اتے ترقی گھنݨ اچ تعاون کریندا رہسی ۔ ݙوہیں رہنماواں بہتر علاقائی رابطے تے اقتصادی ترقی سانڳے سانجھے تعاون تے ڳالھ مہاڑ کیتی جیڑھا جو ݙوہیں ملکاں دا مشترکہ ویژن اے۔ وزیراعظم انوار الحق کاکڑ آکھیے پاکستان،چین نال علاقائی رابطے تے پاکستان دے لوکاں دی سماجی و اقتصادی ترقی کیتے رل تے کم کریندا رہسی ۔ صدر شی جن پنگ پاکستان دے جغرافیے دے لحاظ نال موجود اقتصادی استعداد، اتے اینکوں ابھردا ہویا علاقائی تجارت دا مرکز بݨاوݨ اچ تعاون جاری رکھݨ دا یقین ݙیوائے۔
