اسلام آباد۔26ستمبر (اے پی پی) پاکستان اسرائیل دی ودھدی ہوئی مہم جوئی اتے بین الاقوامی قوانین کوں نظر انداز کرݨ پاروں مشرق وسطیٰ اچ سلامتی دی صورتحال تے توشیش کیتی اے۔ ترجمان دفتر خارجہ ممتاز زہرا بلوچ خمیس کوں پریس بریفنگ اچ آکھیا جو لبنان دے خلاف جاری فوجی جارحیت اقوام متحدہ دے چارٹر اتے بین الاقوامی قوانین دی سنگین خلاف ورزی اے۔ انہاں آکھیا جو ایں خطرناک ودھارے پہلے توں غیر مستحکم خطے اچ امن تے سلامتی کوں ٻیا خطرے اچ پا ݙتے۔ پاکستان لبنان دی خودمختاری اتے علاقائی سالمیت کیتے حمایت دا اعادہ کیتا۔ ترجمان آکھیا جو اسرائیلی قابض افواج غزہ اچ تقریباً ہک سال توں منظم نسل کشی دی مہم اچ ملوث اتے بین الاقوامی انسانی قانون دی سنگین خلاف ورزیاں اچ مصروف اے۔ انہاں آکھیا جو ایں ہفتے اسرائیل 88 فلسطینیاں دی گلی سڑی لاشاں دا ہک کنٹینر غزہ ٻھیج ݙتے جئیں اچ متاثرین دی سنڄاݨ اتے انہاں دی موت دا ویلھا اتے وجہ بارے کوئی معلومات نی ݙتی ڳئی۔ ترجمان آکھیا جو اے ناقابل معافی وحشیانہ فعل بین الاقوامی انسانی قانونی دی خلاف ورزی اے۔ مرݨ آلیاں دے ناں اتے جنس لُکا تے اسرائیلی قابض فوج متاثرین کوں انہاں دی تکریم توں محروم کر ݙتے اتے انہاں دے ٹبراں دی مصیبتاں ودھائن۔ انہاں آکھیا جو کہیں ٹبر کوں آپݨے پیاریاں کوں عزت نال دفن کرݨ دے حق توں محروم نی کیتا ونجݨا چاہیدا۔ ترجمان آکھیا جو اسرائیل کوں چاہیدے جو او مقتولین دی سنجاݨ نشابر کرے اتے انہاں دے لواحقین کوں میتاں دی باوقار واپسی کرے۔ انہاں عالمی برادری توں مطالبہ کیتا جو او اسرائیل کوں اوندی بین الاقوامی دہشت گردی دی کارروائیاں، جنگی جرائم اتے انسانیت دے خلاف جرائم تے جوابدہ کرے اتے فوری کاروائی کرے۔
