پاڪستان جي مرڪزي ڌارا جي سمورين سياسي پارٽين پاران سي پيڪ جي ڀرپور حمايت جي لاءِ مثالي اتفاق راءِ جو مظاهرو

اسلام آباد– 21 – جون (اي پي پي) پاڪستان جي مرڪزي ڌارا جي سمورين سياسي پارٽين چين پاڪستان اقتصادي لنگهه (سي پيڪ) جي ڀرپور حمايت جي لاءِ مثالي اتفاق راءِ جو مظاهرو ڪيو ۽ اڳواڻن هر قسم جي ڪڌي ارادن کي ناڪام بڻائيندي پاڪستان ۽ چين جي وچ ۾ ٻطرفن لاڳاپن کي وڌيڪ مضبوط بڻائڻ جي لاءِ پنهنجي اڻٿڪ عزم جو ورجاءُ ڪيو. اهو سياسي اتفاق راءِ سي پيڪ پاڪستان چائنا پوليٽيڪل پارٽيز فورم ۽ سي پيڪ پوليٽيڪل پارٽيز گڏيل مشاورتي مڪينزم جي ٽئين اجلاس ۾ طئي ٿيو جنهن جي گڏيل صدارت نائب وزيراعظم ۽ پرڏيهي وزير اسحاق ڊار ۽ ڪميونسٽ پارٽي آف چائنا جي عالمي شعبي جي وزير ۽ ڪميونسٽ پارٽي جي مرڪزي ڪميٽي جي ميمبر ليو جيان چائو ڪئي جيڪو پاڪستان جي ٽن ڏينهن جي دوري تي آهي. تقريب ۾ سينيٽ چيئرمين سيد يوسف رضا گلاني ۽ قومي اسيمبلي جي اسپيڪر سردار اياز صادق سان گڏوگڏ سمورين وڏين سياسي پارٽين جي سينيئر قيادت اجلاس ۾ شرڪت ڪئي جن ۾ منصوبابندي ۽ ترقي وارو وفاقي وزير احسن اقبال، ايم ڪيو ايم جو خالد مقبول صديقي، جي يو آءِ (ف) جو مولانا فضل الرحمان، پيپلزپارٽي جي حنا رباني کر، پاڪستان تحريڪ انصاف جو سينيٽر سيد علي ظفر، استحڪام پاڪستان پارٽي جي منزه حسن، نيشنل پارٽي جو سينيٽر جان محمد، سينيئر سياستدان افراسياب خٽڪ ۽ ٻيا اڳواڻ شامل هئا. پنهنجي شروعاتي خطاب ۾ نائب وزيراعظم سينيٽر اسحاق ڊار چيو ته سي پيڪ پاڪستان جي سماجي ۽ اقتصادي ترقي ۾ اهم ڪردار ادا ڪيو. هن چيو ته ملڪ کي لوڊشيڊنگ جي هڪ پراڻي مسئلي مان ڇوٽڪارو ڏيارڻ کانسواءِ سي پيڪ تحت ترياتي منصوبن پاڪستاني عوام جي لاءِ روزگار جا لکين نوان موقعا پيدا ڪرڻ ۾ مدد ڪئي جنهن کي پاڪستاني عوام ڪڏهن به نه وساريندي. وزيراعظم شهباز شريف جي چين جي تازي دوري جو ذڪر ڪندي نائب وزيراعظم چيو ته ٻنهي ڌرين سي پيڪ جي ٻئي مرحلي تي عملدرآمد جي لاءِ اتفاق راءِ جو اظهار ڪيو ۽ منصوبي ۾ ٽئين ڌر جي شرڪت جي طريقيڪار تي صحيحون ڪيون. هن ان ڳالهه جو ورجاءُ ڪيو ته پاڪستان عوامي سطح جي رابطن کي فروغ ڏيڻ جي لاءِ پرعزم آهي جيئن ته ٻئي ملڪ هر موقعي تي هڪ ٻئي سان گڏ بيٺل رهيا آهن. اسحاق ڊار چيو ته سي پيڪ پاڪ چين اقصادي ۽ اسٽريٽجڪ حصيداري جو هڪ اهم ٿنڀ آهي ۽ ان جي اهميت تي مڪمل اتفاق راءِ آهي ڇو ته ان سماجي ۽ اقتصادي خوشحالي ۽ علائقائي رابطن جي حوالي سان پاڪستان جي ڪوششن کي متحرڪ ڪيو. هن چيو ته ٻئي ملڪ سي پيڪ جي اعليٰ معيار جي ٻئي مرحلي جو مشاهدو ڪري رهيا آهن ۽ ان ڏس ۾ ٻئي ڌريون زراعت، انفارميشن ٽيڪنالاجي، صنعت ۽ کاڻين جي کوٽائي ۽ معدنيات جي شعبن ۾ کي ترجيح ڏئي رهيون آهن. چيني وزير ليو جيان چائو پنهنجي ريمارڪس ۾ چيو ته وزيراعظم شهباز سريف جي ”انتهائي ڪامياب“ دوري دوران صحيحون ڪيون ويون، معاهدن ٻنهي ملڪن کي گهربل تبديليون آڻڻ جي لاءِ پنهنجي لاڳاپن کي اپ گريڊ ڪرڻ جو موقعو فراهم ڪيو. هن چيو ته ٻنهي ملڪن جي قيادت جي عزم دنيا کي واضح پيغام ڏنو آهي ته چين پاڪستان دوستي مضبوط آهي. هن چيو ته پاڪستان جي حڪومت پنج اهم شعبن تي ڌيان ڏيڻ جي لاءِ ”فائيو ايز“ متعارف ڪرايو جيڪو گڏيل منزل جي ڪميونٽي کي فروغ ڏيڻ جي لاءِ ٻنهي ملڪن جي عوام جي لاءِ گڏجي ڪم ڪرڻ جو هڪ اهم موقعو پيش ڪري ٿو. هن پارٽي ٽو پارٽي لاڳاپن کي ٻطرفن لاڳاپن جو لازمي جز قرار ڏيندي چيو ته هاڻي وقت اچي ويو آهي ته پارٽيز هڪ ٻئي جي ترقياتي فلسفي کي سمجهي خواب کي حقيقت ۾ بدلائڻ جي لاءِ پنهنجو دانشمنداڻو ڪردار ادا ڪن. هن اعلان ڪيو ته آءِ ڊي سي پي سي ٽن سالن ۾ 300 پاڪستاني پارليامينٽرينز کي چين گهرائڻ کانسواءِ پاڪستاني نوجوانن کي اسڪالرشپ ۽ پيشيواراڻي تربيت فراهم ڪندو. ٻطرفن لاڳاپن جي حوالي سان نوجوان نسل تي اولهه سوشل ميڊيا جي منفي اثرن تي روشني وجهندي هن چيو ته چين هر سال ميڊيا جي ماڻهن کي هڪ ٻئي کي بهتر طور تي سمجهڻ جي لاءِ گهرائيندو. جي سي ايم کي خطاب ڪندي سينيٽ چيئرمين سيد يوسف رضا گيلاني چيو ته سموريون سياسي پارٽيون سي پيڪ جي لاءِ پرعزم آهن ڇو ته ان صحت، تعليم، انفارميشن ٽيڪنالاجي ۽ ٻين شعبن ۾ تعاون کي فروغ ڏيڻ کانسواءِ ملڪ جي بجلي جي مشڪلاتن کي ختم ڪرڻ ۾ پنهنجو ڪردار ادا ڪيو آهي. هن ٻنهي ڌرين تي زور ڏنو ته اهي تعليم ۽ سياحت جي شعبن ۾ حصيداري کي مضبوط بڻائڻ سان گڏوگڏ هڪ سرسبز ۽ مستحڪم مستقبل جي لاءِ گڏجي ڪم ڪن. قومي اسيمبلي جي اسپيڪر سردار اياز صادق چيو ته سي پيڪ بابت پارلياماني ڪميٽي حڪومت جي چوڪس نگراني کي يقيني بڻايو ۽ پاڪستان جي پارليامينٽ کي باقاعده رپورٽنگ جي ذريعي سي پيڪ تحت منصوبن جي اڳڀرائي جي پيروي ڪئي. هن پاڪستان جي پارليامينٽ، حڪومت ۽ عوام جي ماصي جي ڪاميابين کي سگهه ڏيڻ ۽ ان ڳالهه کي يقيني بڻائڻ ته سي پيڪ پنهنجي پوري صلاحيت تائين پهچي وڃي، جي حوالي سان عزم جو ورجاءُ ڪيو. منصوبابندي واري وفاقي وزير احسن اقبال چيو ته سياسي اختلافن جي باوجود سموريون سياسي پارٽيون چين ۽ سي پيڪ جي حوالي سان متفق آهن ۽ اپ گريڊ ٿيل ورزن کي مضبوط بڻائڻ جي لاءِ پرعزم آهن. هن چيو ته چين ان وقت پاڪستان کي بچائڻ آيو جڏهن ان کي 18 ڪلاڪن جي لوڊشيڊنگ درپيش هئي ۽ ڪو سيڙپڪار ملڪ ۾ سيڙپڪاري ڪرڻ جي لاءِ تيار نه هو. وزير سي پيڪ ۾ نئين لنگهن کي شامل ڪرڻ تي چين جا ٿورا مڃيا جيڪي موجوده حڪومت جي متعارف ڪرايل فائيو ايز سان ڳنڍيل آهن. جي يو آءِ جي سربراهه مولانا فضل الرحمان ڪشمير ڪاز جي غيرمشروط حمايت تي چيني قيادت جا ٿورا مڃيا ۽ تائيوان جي معاملي تي پاڪستان جي حمايت جو ورجاءُ ڪيو. هن چيو ته اهڙي طرح ٻنهي ملڪن جي ڪيترن ئي علائقائي ۽ علائقائي مسئلن تي هڪ جهڙا خيال آهن. هن سي پيڪ جي دير وارن منصوبن جي تڪميل تي پڻ زور ڏنو. تعليم واري وفاقي وزير خالد مقبول صديقي ۽ منزه حسن نوجوانن جي صلاحيتن کي استعمال ۾ آڻڻ جي لاءِ تعليم، انفارميشن ٽيڪنالاجي ۽ مصنوعي ذهانت تي ڌيان ڏيڻ تي زور ڏنو. سيد علي ظفر سي پيڪ منصوبن کي تيز ڪرڻ تي زور نو جڏهن ته پاڪستان چائنا انسٽيٽيوٽ جي چيئرمين مشاهد حسين سيد سي پيڪ ٽو کي اڳتي وٺي وڃڻ جي لاءِ سياسي پارٽين جي عزم جو ورجاءُ ڪيو. هن جعلي خبرن جن جو مقصد سي پيڪ ۽ پاڪ چين لاڳاپن کي نقصان پهچائڻ آهي، جي خاتمي جي لاءِ ريپڊ ريسپانس انفارميشن سسٽم قائم ڪرڻ جي تجويز پڻ پيش ڪئي. نيشنل پارٽي جي سينيٽر جان محمد بلوچستان جي نوجوانن جي فني تربيت تي زور ڏنو جڏهن ته افراسياب خٽڪ خطي ۾ ڏاڍ پسند قوتن جي امن کي خراب ڪرڻ جي ارادن جي خلاف خبردار ڪيو. بعد ۾ هڪ انٽر ايڪٽو سيشن ٿيو جنهن ۾ شريڪ اڳواڻن پاران تجويزون پيش ڪيون ويون ۽ اڪثريت عوامي سطح جي رابطن کي وڌائڻ جي لاءِ پارلياماني مٽاسٽا تي وڌيڪ ڌيان ڏيڻ تي زور ڏنو ويو.

مضمون کا ماخذ : bolão dupla sena

متعلقہ مضامین