پاڪستان ۾ ايٿوپيا جي سفير ڊاڪٽر جيمال بيڪر جي اڳواڻي ۾ ٽريل 5، مارگلا هلز تي صفائي جي مهم: پرڏيهي آفيس جو ترجمان

اسلام آباد-31 آگسٽ (اي پي پي)پاڪستان ۾ وفاقي جمهوريه ايٿوپيا جي خصوصي ايلچي ۽ سفير ڊاڪٽر جيمال بيڪر ڪالهه اسلام آباد نيشنل پارڪ، ٽريل 5 ۾ مارگلا جي جبلن کي ڪچري کان پاڪ ڪرڻ لاءِ صفائي جي مهم جي اڳواڻي ڪئي جنهن سان جهنگلي جيوت کي شديد خطرو لاحق آهي. پرڏيهي آفيس جي ترجمان طرفان جاري پڌرائي موجب ايٿوپيا جي سفارتخاني، گهوم لي ۽ اسٽوڊيو ون جي انتظام هيٺ گڏيل طور هن مهم جي شروعات ايٿوپيا جي وزيراعظم ڊاڪٽر ابي احمد جي گرين ليگيسي انيشيٽيو تحت ايٿوپاڪستان برادري جي حصي طور ڪيو ويو. صفائي مهم ۾ حڪومتي عهديدارن، سفارتي برادري، سول سوسائٽي، نوجوانن ۽ ميڊيا سميت زندگي جي سمورن شعبن سان تعلق رکندڙ ماڻهن شرڪت ڪئي جنهن جو مقصد ٻنهي ملڪن جي بهتر مستقبل لاءِ گڏيل ڪوششن کي اڳتي وڌائيندي ايٿوپاڪستان ڀائراڻي لاڳاپن کي هٿي ڏيڻ هو. ان موقعي تي ميڊيا سان ڳالهائيندي ڊاڪٽر جيمال بيڪر چيو ته اڄ جي اجتماع جو مقصد اهو پيغام ڏيڻ هو ته انساني ۽ مالي وسيلن جو وڏي پئماني تي متحرڪ ٿيڻ حاضر ۽ نئين دور جي چئلينجن جهڙوڪ موسمياتي تبديلي جي مسئلن کي منهن ڏيڻ جو هڪ حل آهي. هن چيو ته ايٿوپيا گذريل پنج سالن ۾ ميوون، ڀاڄين ۽ گاهه جا 40.5 بلين کان وڌيڪ ٻوٽا لڳائي هڪ سبز معيشت جي تعمير ڪري رهيو آهي جنهن سان ايٿوپيا ۾ روزگار جا موقعا پيدا ٿيا آهن ۽ خوراڪ جي حفاظت کي يقيني بڻايو ويو آهي. گرين ليگيسي انيشيٽيو تحت رڪارڊ ٽوڙ وڻڪاري مهم جي شروعات ڪئي وئي آهي جيڪو ميڊيمر فلسفي کان متاثر اسان جي وزيراعظم جي قدمن جي عڪاسي آهي، اهي قدم وسيلن کي وڏي پئماني تي متحرڪ ڪرڻ ۽ انهن جي صف بندي جي وڪالت ڪن ٿا. هن چيو ته اسان پاڪستان ۾ ان گرين ليگيسي انيشيٽيو جي شروعات ڪئي آهي، ڇاڪاڻ ته مان ذاتي طور پاڪستان جي سمورن شهرن ۾ ويو آهيان ۽ معاشري جي سمورن طبقن کي ماحولياتي تبديلين جي سنگين خطرن کي گهٽ ڪرڻ لاءِ متحرڪ ڪيو آهي. هن نوجوانن تي زور ڀريو ته هو اهڙي طرح جي اهم قدمن لاءِ سڀ کان اڳيان رهن. هن اسلام آباد وائلڊ لائيف مينيجمينٽ بورڊ،گهوم لي۽ اسٽوڊيو ون جو ٿورو مڃيو ته هنن اسلام آباد ۾ ايٿوپيا جي سفارتخاني سان گڏجي اهڙي انسانيت دوست ۽ مهربان قدمن جي حصيداري ڪئي، ايٿوپيا جي سفير ٻنهي ملڪن وچ ۾ معيشت، تعليم، صحت، موسمياتي تبديلي، ثقافت ۽ ٽيڪنالاجي جي منتقلي جهڙن مختلف شعبن ۾ ٻطرفي علائقائي ۽ گهڻ رخي تعاون کي وڌائڻ لاءِ ايٿوپيا سان ڪم ڪرڻ لاءِ پاڪستان حڪومت جي عزم کي به ساراهيو. گهوم لي (پرائيويٽ) لميٽيڊ جي چيف ايگزيڪيٽو آفيسر محمد حارث ٽريل 5 مارگلا هلز جي صفائي لاءِ پنهنجي تنظيم ۽ ٻين سان حصيداري ڪرڻ تي ايٿوپيا جي سفارتخاني جو ٿورو مڃيو. هن وفاقي گادي واري شهر اسلام آباد ۽ ٻين شهرن ۾ ماحوليات جي تحفظ لاءِ ضروري قدم کڻڻ جي عزم کي به ورجايو.

مضمون کا ماخذ : quina acumulada

متعلقہ مضامین